上個月擺完70大壽的老闆慨歎：「以前讀書的時候，等來等去都未到一年。現時眨眼間，2025年都過了六分之一。年紀大了，才真正明白『光陰似箭，歲月如梭』的感覺。捱到今日才有閒情逸致歎吓魚子醬、飲吓香檳。點捨得咁快『瞌埋眼』？」
另一位長輩感同身受道：「後生搏到盡，人生60歲才開始收成期。我哋呢啲『老海鮮』，𠵱家先係人生最過癮時候。個個『老鬼』都係『唔捨得死協會』主席。我想長命，就每日朝早5點起身做運動，食藥準時過交易所開市！聽講不久就研究到長生不死之藥，最緊要有命等到。」
有朋友奸笑插嘴：「我唔捨得死，主要係想睇一啲『牙擦仔』收尾嗰兩年怎過。歌手蔡楓華有話：『一剎那嘅光輝唔係永恆。』冥冥中自有主宰，天網恢恢，點可能『殺人放火金腰帶，修橋補路無屍骸』？我真想目睹啲奸商最後點收科。唔好講太遠，近年我都見唔少風雲人物嘅收場，超級『心涼』。當然，要睇惡人點死，先決條件係你自己要夠長命！」
坐角落的退休校長淡然說：「其實我唔捨得走，只係為咗送埋最後一程。」隨即摸出銀包裏發黃的全家福：「我老婆走的時候，捉著我雙手話『唔好跟埋嚟，睇埋個孫畢業先』。我每日晨運，又戒酒、改飲參茶，就係想睇到個孫仔戴四方帽。」他眼角微濕：「死亡雖然可怕，但我都慶幸做咗最後執屋嗰個，幫老婆搞埋身後事。」唔捨得死，原來除了因為有錢，也是因為留戀兒孫歡樂笑聲。要微笑到最後，是為了那些生命中無可替代的愛與親情。
作者介紹
- 「健康教育基金會是一個非營利組織團體。我們的目標是努力地向社會上不同組織，無論公共或私人機構，社區和個人，以鼓勵及正面方式支持大眾預防疾病，以延長生命和促進人類健康。健康教育基金會的始創人是醫療保健領域的專家：分別是 香港醫護學會創會主席的關志康先生和曾擔任 香港衛生署副署長及食物安全專員的譚麗芬醫生。」
相關文章
專科交流23 9 月, 20262026年9月23日「醫療發展研討會暨晚宴」
媒體資源22 9 月, 20262026年9月22日「電台節目-醫護從心出發」
健康講座20 9 月, 20262026年9月20日「港深醫療協作・專業交流團」
媒體資源15 9 月, 20262026年9月15日「電台節目-醫護從心出發」
